ابـــــــــــــــــــــــــــــــــ ــــــــونـــــــــــــة

كنه صغار نكعد وكت الغروب بباب الدار ننطر جيت ابونة

يرجع مبتسم بس وجهة متعوب ومن يشوفنه يضحكن عيونة

يجي محمل ابونة اشكال والوان وتظل تلوم بيه امي الحنونة

تعبك هذا تعبك لا يبو فلان تتعب والصغار يضيعونة

لكن يبتسم ودموعه بالعين ويكل لأمي التعب يستاهلونة

هذولة حزام ضهري بساعة الضيج وألج بالشدة يم افلان عونة

ابونة على جتافه كبرنه صغار وكبار ولعبنه سنين وما تعبن متونة

يلبسنه حرير وهوة محروم وقميصه من التعب مكلوب لونة

وأذكر لو لعبنه الوالدة تصيح لايولد ابوكم نايم لا تفززونة

*******************************************

ابونة بدنيته ما يوم مرتاح وياه الدنيا صعبة وما يملها

عنده المهم تعب واحنة نرتاح وابد منية احد ماقبلها

يرجع ضهره محني وجسمه تعبان وتتلكاه امي ويضحكلها

وكبل ما توصله وتسلم عليه الله يساعدج هوه يكلها

ابونة من المصايب يحمل جبال ولا يحمل عتب امي وزعلها

تعب جاع وعطش مادنك الراس ولا رخص ركبته ومرة ذلها

اصلب رجل بينه بمحنته يكون اصعب مشكلة بيدة يحلها

بس اضعف رجل بالعالم يكون اذا امي المرض مرة وصلها

امي شكد تحبه شكد تداريه مدللها الكبير وهوه خلها

بس لو غضب مرة ولأمي يندار ترجف خوف لمن ينظرلها